رسائل الزمـــن المــــر5
كتبهايمنى و دارين ، في 6 فبراير 2007 الساعة: 10:53 ص
رسائل الزمن المر (5)
عبد المجيد راشد
وصلتنى الرسالة الخامسة من أخى و صديقى الشاعر الرائع أحمد شلبى فى الجمعة الثانى من فبراير .. و رددت عليها فى السبت الثالث من فبراير .
و إليكم الرسالة و الرد
أولا : الرسالة
********
يا سيدى الحسين ..الجليل
ياللى خضيت الجزيره
ورجيت العرب
يا من هزمت الموت
ودوخت التعب
وعلمتنى الثورة
وازاى تكون الوقفه
وازاى يكون الغضب
وحررت السيوف
من جوف غماد الخوف
علمتها عشق الصليل
وأطلقت الصهيل
من حبسته فى الخيل
وغسلتنى
بدمعة الحزن النبيل
يا سيدى الحسين .. الجليل
انا كلمة الناس فى غليان الشجن والدم
وبارئ الاحساس من اللفظ الأصم
مالقيتش غيرك اشتكيله الهم
يا سيدى الحسين .. الجليل
لابسنى هم تقيل .. تقيل
أتقل من جثة قتيل
ولون خرمسات الليل
ووقت انتظارى لتارى
وانا مرمى جمرة غليل
أتقل ..من دم .. كلام ..نفس ..
جزمة حاكم عميل
على بسملة حلمى الجميل
اتقل من ضل علم اسرائيل
على قلب نهر النيل
يا سيدى الحسين ..الجليل
لابسنى هم تقيل ..تقيل
وقلبى مش قادر يشيل
ياسيدى الحسين ..الجليل
يا مية الحب المسالة
وعنوان سبيل البساله
والشهاده الرساله
انت المدد ..والدليل
ومقدمة وختام كتاب السبيل
أحمد شلبى
ثانيا : الرد
*******
يا سيد الشباب
فى الدنيا والآخرة
مشتاق أشوف وجهك
و طلعتك الساحرة
يا إمام المظلومين
و الحيارى
المقاومين
و السهارى
حراس بيبان الأمة
من العدو الرمة
صهيونى عارف
إن موتى ف حياته
و حياتى هيه ف مماته
مشتاق أطل
على طلعتك يا إمام
و وقفتك فى الطل
و كلمتك فى التاريخ
هيهات منا الذل
مشتاق تطير روحى
تحكيلك عن الإحفاد
و عن معارك جنودالله
و الاستشهاد
وعن يزيد اللى دمه
مورثه لعبيد
حكام خيانه ومذله
هيهات منا الذلة
هيهات منا الذلة
الله عليك يا إمام
يا سيد العشاق
للحق و الأمة
الله عليك يا إمام
يا كاشف الغمة
و محدد الحد
بين الذل و العزة
بالوقفة الحاسمة
يا سيد الشباب
الأمة متقسمة
بين الملوك اللى دخلوا
كل القرى و افسدوها
و بين مقاومة عنيدة
فى الحق صلبة شديدة
ميهمهاش الملوك
و لا الخريطة الجديدة
لشرق أوسط جديد
يفتت الأمة
و سلاحه
شيعة و سنه
و الأمة متوحدة
على دمك اللى سال
تبكيك
فى ساعة يجد جديد
تتذكر الوقفة
فى وجه يزيد
هوه العدو الحقيقى
أما الغريب
فأمره يسير
يا سيد الشباب
الأمة منصابة
ف حكامها
هما العدو الحقيقى
و هما باب الشيطان
عصابات وخاطفة الأمة
رهنينها للأمريكان
يا سيد الشباب
فى الجنه و الآخرة
دمك بيسرى
فى الشريان
واقف
فى وجه الشيطان
صهاينة
أو أمريكان
و لكل حاكم جبان
خاين و بايع بلادنا
عهدا علينا وولادنا
ما نغير الإتجاه
صوتنا يسير لمداه
لا دهب المعز يعز
و لا اغراءاته بجاه
عهدا علينا يا أمام
نمشى على سكتك
و نفتكر وقفتك
للحق و الأمة
يا كاشف الغمة
عبد المجيد راشد
السبت
الثالث من فبراير
ـــــــــــــــــــــــــــــــــــــــــــــــــــــــــ
التصنيفات : أشعار المقاومة | السمات:أشعار المقاومة
أرسل الإدراج | دوّن الإدراج
فبراير 6th, 2007 at 6 فبراير 2007 2:07 م
شكرا اخي على الموضوع المفيد و اتمنى ان تزور مدونتي لمزيد من التواصل و تلاقح الافكار