رسائل الزمن المر (8)
كتبهايمنى و دارين ، في 9 أبريل 2007 الساعة: 06:42 ص
رسائل الزمـــن المـــــر (8)
عبد المجيد راشد
وصلتنى الرسالة الثامنة من أخى و صديقى الشاعر المبدع أحمد شلبى فى الثلاثاء ، الثالث من إبريل 2007 و رددت عليه فى نفس اليوم .
و إليكم الرسالة و الرد
أولا : الرسالة
العراق
ليه العراق فى الوعى والوجدان
كلنا عارفين-
ليه العراق دونا عن البلدان
كلنا عارفين-
امتى العراق فلت من السندان
كلنا عارفين-
هل العراق يا عرب آخر الأحزان
كلنا عارفين-
مين اللى خاننى ف سره وف جهره
مين اللى عدا عدوى على ضهره
مين اللى وسع له لما صهل مهره
مين اللى حلل لواطه
وفلسف لنا عهره
مين اللى داس واتك على جبهتى بالكعب
مين اللى حس بأمان لما قتلنى الرعب
مين اللى بشبع لما يجوع الشعب
لكن الجواب الأمر والسؤال الصعب
هو احنا فين-
اتعرى لحم العراق قدام عيون الفتك
طوله وعرضه مباح للاغتصاب والهتك
أعداء وخونه قطايع عالعراق زاحفين
اللى بيهبش بمخلب واللى بينهش بناب
حمم من الحقد الدفين من سنين السنين
وانفتح له الباب
ومين فتح له الباب-
واحنا
مش ولاد مومس ولا عميا أعذرنى يا سياب
هما اللى ولاد قحبه
احضرنا يا نواب
احنا اللى كنا
وهنا
لما مكنا منا
تاجر الشنطه والنورى والكداب
وسيبناه على ارضنا يثبت فى اوتاده
ويحضر فى اسياده
وماتفرقشى
اجبرنا او اخترنا احنا الغياب
وبرغم قلقى على العراق
والخوف اللى عليه خايفه
قدامى العراق شايفه
بركان نبيل للغضب يعصى على الخيه
قلعة اسود العرب وعزتى الجايه
شباب وتعبو التعب وبيحررو الحريه
وبيرقعو توب الوطن
بجلودهم النيه
وبيغزلو بيرقه
بعروقهم الحيه
شباب فى زمن العما …
هما البصيره والبصر
شباب …
ومن صلب الحسين والرشيد ونبوخدنصر
شباب …
اقسى من الديناميت
اعذب من الانهار
وبيصفعو امريكا
فى الليل وعز النهار
وبدمهم والنار
بيرسمو الاشعار
ويعنونو الاخبار
فى ديالى والموصل
وحديثه والانبار
وكركوك وشارع حيفا
وفى النجف الشريفه.
صحو فينا الهمم
وقلبو طاولات القمم
على رؤوس الرمم
والله زمان ياعراق
والله زمان ياشمم
أحمـــــد شلـــــبى
ثانيا : الـــــرد
(1)
الدم عنوانك يا أمة
من قديم الأزل و من بعد همه
مكتوب علينا الجرح ما يتلم
غير بعد سيل الدم
مكتوب علينا الملاجىء تتملا
و صوتنا يصرخ فى الخلا
و قلوبنا تنداس فى الفلا
مكتوب علينا الصحرا تملانا
تندس فى ثنايا الروح
و لا تروى عطشانا
تنزف نفوسنا
من قهر اللى غازانا
و من طعنات حكام الخيانة
و من قلة الحيلة
و من أحزاب عويلة
و من نخب هزيلة
و من وشوش ذليلة
و كل ده فى التاريخ مكتوب
نفس الحكاية
نفس الرواية
و نفس أشخاصها
تتغير الأسماء
تتغير الأشكال
و يفضل المضمون
و نعيد تانى الحكاية
من بعد كبوة ..نهضة
من بعد ذلة .. قومة
و الفضل للمقاومة
مش أنظمة جبانة
مستسلمة و مهانة
(2)
الله عليك يا عراق
يا مجمع العشاق
وراوى عطش مشتاق
و موحد الأشواق
على ربيع المقاومة
و زهرة الأشواك
الله عليك الله
انت وحزب الله
و كل المقاومة الشريفة
من المحيط للخليج
متوحدة فى إطار
حالم بدولة جديدة
ليها علم ونشيد
مش شرق أوسخ جديد
مليان كلاب و عبيد
(3)
الله عليك يا عراق
يا دمعة الحزن الجليل فى كربلاء
و هزيمة السيف الرهيب أمام الدماء
و ذل يزيد فى مواجهة الشهداء
و انتصار المعانى النبيلة
على الخيانة الذليلة
و هجمة الأعداء
من المغول و التتار
و الانجليز و الأمريكان
بغداد ما تهدى
و لا ينام السلاح فيها
و لا عمرها سلمت لأعاديها
عنوانها كان الدم
صيحتها كانت موت
غضبها نار بركان
شوكتها لا تنكسر
و لا ضهرها ينحنى
شموخها زى النخيل
واقف يصد
صامد يرد
عازم يشد
جذره يحد
فرعه يمد
و يصحى أمة من سباتها العميق
ينجد بحبله الغريق
و ينور القنديل فى ليلها الغميق
و بعد طول الفراق
تجمع الشقيق مع الشقيق
و ف ندهه واحدة يتوحد النداء
عاشت الأمة
عاشت العراق
عاشت العراق
عبد المجيد راشد
الثلاثاء
الثالث من إبريل 2007
ـــــــــــــــــــــــــــــــــــــــــــــــــــــــــ
التصنيفات : أشعار المقاومة | السمات:أشعار المقاومة
أرسل الإدراج | دوّن الإدراج
أبريل 12th, 2007 at 12 أبريل 2007 1:02 ص
ياااه من العراق
يا رب اغيثهم فهم في ورطه بحق
وانا عامل بحث عن العراق هنا في مدونتي
http://ibnasser.blogspot.com
تحياتي الي المدونه الرائه التي تعكس مواقف وطنيه
وارجو التواصل بيننا
تحيات
يابن ناصر
يناير 4th, 2009 at 4 يناير 2009 10:44 م
نادي مصر
لما نخلة في العراق تغتصب
لما غزة تهتف (ولا من مجيب ) يا عرب
لما زي الحريم باشق توبي
وانتحب
نادي مصر
تلقى ألف مليون سبب
للشريفة تزني
والراجل يطاطي
وقناة السويس تنسى ناصر
هيكبر فيك العجب
وتسأل
تمانييييييييييييييييييييييييييييييييين سنة عدت
والأخ لسة قاصر
مش بيعرف حتى يقرا الخريطة
آآآآآآآآآآآآآآآآآآآآآآآآآآآآآه
لما يحكم الندل ابن العبيطة
لزمن
وحتمن
أنتحب
مش لغزة أو للعراق
مش هوه دا السبب
قهري في المراية أكبر سبب
(مجرد تحية)