خليك فى البيت

    عبد المجيد راشد

فى تلاتة و عشرين من يوليو

خليك فى البيت

و قول نويت

الفجرقايم

و الحق دايم

و الصبر طال

يا مصر يا عمال

يا فلاحين

طلاب

نساء و رجال

أطفال

أبطال

آن الآوان

دق الجرس

و يا الآدان

الجد حان

و أول خطوته

نرفع راية العصيان

      …

فى البيت خليك

احكى لولادك حكايات الظلم

عرفهم إن نظام الحكم

عميل

و جبان

ناهب خيرنا

عصابات حكمانا

خلت أيامنا سواد

عتمة  و ضلمة

الفجر زاد

و البطش عاد

عنوان بلدنا بقى الفساد

احكى لولادك و الاحفاد

حكايات العزة

صفحات النصر

أيام العدل المروية

فى تلاتة و عشرين من يوليه

       …

عرفهم ايه اللى بيحصل

نهب و سلب و ظلم و قهر و جور

ما تخليش الطابق مستور

افضح كل كلاب السلطة السعرانة

كل رموز لخيانة

كل العصابات الحكمانا

أولاد الكلب

مفيش فى صدورهم قلب

لا يعرفوا قيمة و لادين و لا رب

و لا فى حسابهم كلمة شعب

        …

خليك فى البيت

أول طريق عصيانا بديت

و قول نويت

الفجر قايم

و الحق دايم

و الصبر طال

و مفيش محال

مفيش محال

                السبت 9/6/2007

الأخوة الأعزاء : أتحفنا الأخ الأحب الأشعر المبدع / على إبراهيم بهذه الأبيات تضامنا مع حملة خليك فى البيت و ارفع علم مصر فى 23 يوليو

 اقعد معانا
خليك ايجابي
واسمع ندانا
بلاش تحابي
في نظام مرابي
حتي ف دمانا
…
اقعد في بيتك
احكي لعيالك
ازاي حرامي
يسرق في مالك
بيبيع في قوتك
مستني موتك
اوعاك يفوتك
اليوم امانه
….
دا يوم علامه
ليوم قيامه
هنقومها بكره
والله فكره
والفكره ياما
كانت بسيطه
وابن العبيطه
هيروح في طيطه
اللي ابتلانا
…
مهيش مظاهره
ولا حتي سهره
لو غاوي شهره
مش اي مهره
تركبها تطلع معنا ف سمانا
…
بنقولها تاني
يا مصر ياني
يا مجنناني
امتي ولادك
يدروا المعاني
ويقوموا بدري
نمحي المهانه
………….

على ابراهيــــم

 الأخوة الأعزاء :

كالعادة تألقت أختنا الأعز د. حنان فاروق و تضامنت مع حملة خليك فى البيت بهذه الأبيات الرائعة :

خليك في بيتك ماتهرب
لاالغول يجيله يهده
ابنى الولاد ماتخرّب
بكره بدموع مايعدو
إن كان ألمنا يموّت
الفرحة راح تيجي بعدو
ياللى ابتليت بالمصايب
لك رب يرفعها وحده..